الثلاثاء، أغسطس ٢٣، ٢٠٠٥

دا شغل حريفه يا باشا

بجد يعني لو عايزين تتعلم ازاي توصل لهدفك لازم نبص للتجربة الفريده دي اللي طُبقت بمنتهى البراعة على بلدنا المتهاوي مصر ..... من غير دراسة ولا وجع قلب منطقيا عشان تعرف تهزم عدو كبير لازم تخطط صح وتتمتع بطول بال وتحاصر الهدف ده من كل الجهات وبكل الأشكال بحيث متديلوش فرصة يضحك عليك من أي ناحية ولما تضرب تضربه في المكان اللي يكون في مقتل بحيث الوقعه تبقا وقعه بجد ، ويبقا خلصان من كله
ولما نموت كده وتظهر أجيال وأجيال بعدينا وربنا بفك كرب الامه دي والعيال الصغيرة يروحو المدرسة ويتعلموا تاريخ اللي هيتكتب عننا هيبقى درس في حد ذاته ... أي والله درس ربنا قدر لنا نكون احنا عنوانه وسطوره لجيل تاني هيشارو على الفترة دي ويقول فترة الانتكاسة الاعظم في حياة مصر والحرب الضارية على الاسلام
وهم على فكرة معاهم حق .... أيوه الصهيونية العالمية والماسونية المتخفيه في عبائتها وذيول الحروب الصليبة معاهم حق عشان تهزم الامة دي اضرب في كل ناحية وموت مصر بالراحه لانها لو قامت هتقوّم الكل معاها
خدها بالراحه خالص هدها عسكريا من حرب لحرب وموت في كل بيت واحد وخلي السلام حلم بصرف النظر عن حقيقته بقا مهو محدش هياخد باله .... مسكها لناس فاسده ودوقها الاضطهاد السياسي على جرعات لحد ما يبقى الخنوع السياسي عادة ، عليك وعلى المرأة ، شوية ستات منكوشين ينخوَرا في دماغ الستات والبنات ، اصل الام دي لو بقت محترمه هتطلعلك يا عم عيال فراودة دينيا ووطنيا واحنا مش ناقصين ؟؟؟ خش ع الشباب بقا واديها تفاهة وتسطيح وتحطيم معنوي وثقافة ضحله ، اطحنه في التعليم وطلعه جاهل ، زود البطاله خليه يكره البلد ويبقا بيعها سهل عليه، متنساش وسط التتفيه تخلي المدرس مسخه وتريقه والعالم جلابيه وعمه ومليون نكته .... واي واحد بيفهم شويه اطحنه احباط بحيث يا يهج من البلد يا يموت ويريحنا ، وفهم الشبابان عندك جيش قوي ومحدش قدك ودخله الجيش انهب عمره وفرجه على الآدميه المبتذلة تحت رجلين الظباط خليه يكره الجيش وسيرته ويفوق م الكدبه الكبيرة ويخرج عاطل بالأقدمية ، طبعا اهل السلطه شغالين بقا على الاقتصاد الله ينور ....اصل دول متنقيين ومبدأوش معانا بالاوحش لأ بداوا باللي نص نص والسوء بيزيد طرديا مع انهيارنا احنا داخليا كبشر بحيث وقت ما يحكمنا الأسوأ نبقا زي ما احنا دلوقتي اوهى من خيوط العنكبوت ، وعلى طول الرحلة دي عليك وعلى الصحة، اديها سموم في الاكل والشرب، اديها تلوث في كل شيء، عشان انهارده تسجل مصر اعلى المعدلات _ نسبيا _ في المصابين بمرض السرطان والفشل الكلوي والكبد ، أمراض لا بقت واقفه على صغير ولا كبير ، لا فيه فلوس تعالجها ولا حد لاقي ياكل اساسا .ويكتمل مثلث الفقر والجهل والمرض ، ويم ما أبكي من مقالات العالم الللي اتريقت على المسلمين بعد احداث شرم الشيخ الاقي اختي الصغيره بتقولي انتي واجعه دماغك ليه ؟ اقولها دي بلدك ؟ تقولي وهيه بتضحك بأمارة ايه ؟ والاقي صديقتي المثقفه ترمي جريدة الدستور من ايدها وتقول بغل ... والله لو امريكا جت وخلصتنا م القرف ده ما هزعل !!!!! برافوا، قتلت خصمك وبحرفنه، تفتكروا نقدر نغير كل ده ازاي ، لازم نكون أكثر حرفنه ، وندور على اللي أقوى من امريكا ومن اليهود ، واللي أقوى لا هو كرسي الحكم ولا الاحزاب ، اللي أقوى من ده هو الهدف اللي كل ده اتعمل عشانه ... محمد والقرآن .، ومحدش يقولي بقا نظرية المؤامرة عملتلك بالو اللي يفكر بالمنطق هيلاقي كل ده مش ممكن يكون صدفه ولا معناه اننا ضحيه ، يمكن بقينا ضحية دلوقتي بعد ما القتلة بقت رسمي ، لكن الحقيقه اننا مش ضحيه واللي غلبونا غلبونا عشان حربهم كانت من منطلق ديني ،مره للصليب ومره لارض الميعاد ، لان قوة العقيدة الدينية _ والقوة يعني الايمان مش التعصب _ هيه الغاية اللي مفيش قوة ممكن توقف صاحبها عن خلق الوسيله بكل طريقه ، وده مش كلام اسلاميين ده كلام العقل والمنطق لتاريخ شارح نفسه ومش محتاج فلسفه


هناك تعليق واحد:

وليد يقول...

هما قدروا يكرهونا فى البلد

نجحوا فى ده