الجمعة، أغسطس ٢٦، ٢٠٠٥

شخبطة

أيوه انا خايفه
خايفه وحاسه فـ قلبي برجفه
يمكن برد الشتا جوايا
يمكن حلمي بيهرب مني ورافض يبقا حقيقه معايا
يمكن لما السكة بتطول غصبن عني بحس الخطوة بتجري وواقفه
نفسي في ضله
نفسي في ضله وريحة خُضرة وشربة ميه في عطش الزحمة بطعم القلة
نفسي في ضمه وريحة فله
نفسي في حاجه بجد كبيره
آه لو أرجع
آه لو أرجع أجري وأجري وتجري ورايا يا قلبي ضفيرة
فجري يشقشق ومن الأول يغزل ضي الحلم أميرة

هناك ٥ تعليقات:

وليد يقول...

يا بنت يا عادية
كده بتحرقى الديوان التانى


لانها بصراحه
جميله ومعبره

وليد الريدي يقول...

لقد أحسست برائحة الخوف بين السطور

قصيدة جميلة فعلا

رشا عبد الرازق يقول...

تؤتؤتؤ اطمن انا عندي ناشر بعيد عنك حقنه مقدرش احرق حاجه من الديوان بعدين يضطهدني واحنا مش قد كلاكيع في الدماغ الله يسترك يا وليد ربنا يجعل كلامنا خفيف ... تسلم يا أفندم

رشا عبد الرازق يقول...

أهلا كتكوته منوره مدونتي المتواضعه وادمانك لشغلي ده بقا ليه حسابات تانيه حكم انا مفتريه وبدقق اوي في الحسابات .. وبالنسبة للخوف بالنسبه ليه ده رحلة حياة مش هتكفيها مدونه واحده ولا اتنين ولا عشره ... مش لأنه جوايا .. لكن لأننا لينا مع بعض حكايات وحكايات بين غالب ومغلوب .... وادينا مستنين بكره مين عالم يمكن ....!! :) شرفتيني بجد

رشا عبد الرازق يقول...

وهذا ما كان يا وليد ... ولهذا اتاك :) شكرا لاطرائك وخالص امتناني