الأحد، مايو ٢٠، ٢٠٠٧

بفتح البــاء ... والــواو ...... والظـــاء

شفتو ميس ايجبت السنه دي ؟
لأ ؟
ولا أنا
طب شفتو مستر ايجبت السنه دي ؟
لأ
ولا انا
أصل أنا رجعيه
ومفهومي عن الرجاله لسه مختلف

طب شوفتو ميس ايجبت السنين اللي قبل كده
لأ
انا شفتها

طب للي شاف ومشفاش
كلنا عارفين قطعا
طب بلاش
شفتو أ. وائل الابراشي في برنامج الحقيقه
أنا شفت
وطبعا كلكم شفتوالحلقه وسمعتوها
أهي بجد بجد
هيه دي المهازل
مهازل بجد

أب ... محموق أوي
ثائر
هائج
يتهم الجميع لان ابنته ظهرت على صفحات المجلات في ثوب لا يغطيها
لكنه يؤمن
وبنفس الحمقه
أن من حقها ان تحلم ان تصبح ملكة
ملكه في ايه يا عم الحج الحمش ؟؟ محموق ليه مدام
مفيش مانع انها تلبس مايوه قطعتين جوا المسابقة وامام لجنة التحكيم وفي الحفلات
آآآآآه
محموق أوي عشان دخل اللوبي بتاع الفندق فلقى ملكات الجمال وفتيان الوسامه خلطبيطه
تقريبا حد كان قايله انه هيبقى فيه محرم مع الأموره
مصدوم جدا رغم أنه شايف ان البنت من حقها تتسابق على جمالها وانوثتها والناس الوحشين الشياطين هم اللي أساؤوا استغلالها
مع اني الصوره بتاع بنته كانت نموذج للاتقان الصراحه ولا عارضات الأزياء
يعني محدش كتفها
لأ
وبيستشهد ان عبد الناصر حلق لفتيان الجمال ع الزيرو ووداهم الجيش
دي الرجوله
لكن البنت
وماله
مدام مربيها كويس
خلاص يا عم الكويس يبقا زمايلها يطلعولها الأوضه ميطلعوش تعبان ليه
هيه هتتصرف


مدام التربيه الأخلاقية الصارمه هتحميها لو في قلب آتون
أمال محموق ليه يا بيه ؟
متزعلش
ان شاء الله تفوز المره الجايه يا سيدي الصابرين بخير
... طب يا ريتك كنت قلت انك مؤمن بقلة الحيا
بجد
كنت هحترمك أكتر
مش اكتر يعني أوي بصراحه
بس على الأقل أهو كان هيبقا عندك شيء مؤمن بيه حتى لو كان الشيء ده الغلط في أكمل الصور
ومكنش يبقا فيه لازمه
للردح للاهالي التانيين اللي جايين يتهموا المصريين بالجهل عشان مش فاهمين البعد الثقافي الخطير لفتى مصر وفتاة مصر
يا حلاوه يا ولاد
هم الناس دي منين ؟
مين دول
ومين دوكهم ؟ أكيد أكيد
دول الزمن ده .... دول الجهل
الجهل بكل شيء
الجهل بالدين
الجهل بالأخلاق
الجهل بالأعراف
الجهل بالعلم
الجهل حتى بقلة الأدب
أيوه والله
حتى قلة الادب مش عارفين يعملوها صح
عشان كده بقينا عاملين زي اللي رقصوا على السلم
يا شيخ جاتكو ستين خيبه على خيبه
اللي قالو المسابقة ثقافة
واللي قالوا عليها حلوه ومهمه ولذيذه .. بس التنظيم هو العيب والعيبه

مش قادرين لا دول ولا دول يفهمو ان مسابقات الجمال اللي بتتعمل في أوروربا وامريكا
مسابقات من قلب المجتمع والبيئه
ليها مرجعية
بصرف النظر اذا كنا متفقين مع المرجعية دي واللا لأ
مش مهم
مهياش بتاعتنا بتاعتهم هم وبيعملوها صح
انما احنا لأ
زي اللي بيلومو على اسرائيل انها بتقتل الأبرياء
واسرائيل بتدافع عن اللي دينها وميعادها المزعوم من وجهة نظرها وبتربي ولادها على كده وولادها بيعملو بكده
لكن العيب فينا احنا
عشان احنا بنتكسف ندافع عن الدين اللي لينا ونقول ان احنا بيه وهو فينا
فبنخسر
عشان احنا مش عايزين نؤمن باللي يخلينا نكسب ومنخافش ونقف للي ظالمينا من جوا ومن بره
وبالمثل
المستوردات دي مش بتاعتنا
مش هنعرف نظبطها
عشان احنا مرجعياتنا مختلفة
بالنسبه لأوروبا وامريكا دي ثقافة
عادي يعني
محدش مستغربها ولا مختلف على كيفيتها
لكن بالنسبة لينا دي جزء من الامراض الطفيلية الكتيره اللي بتنخور فينا عشان احنا ببساطة مش عارفين نعمل أي حاجه بجد
من اللي بنعرف نعملها ولايقه علينا
العلم لايق أوي على مصر
الدين اللي بجد _ أيا كان _ لا يق جدا على مصر
قهاوي الشعراء والأدباء والساسه اللي بتطبع عمالقه ورموز لايقه جدا على مصر
نجيب محفوظ واحسان عبد القدوس وأم كلثوم لاقين جدا على مصر
اتحادات الطلبه ومظاهراتهم وجسارة قلوبهم واحلامهم العريضه لايقه جدا على مصر
الرياضة والكورة لايقين جدا على مصر
الصحافه الحره بجد لايقه جدا على مصر
النكته ..... وخفة الدم ...... الطيبة والبساطة والرغيف السخن وحضن الأم
ويا عم سلمها لربك بكره تفرج ....
متيجي تشرب شاي ... واهلا وسهلــ ــمبك
.... ووالغيط والمصنع والرجاله اللي بجد
كل ده لايق أوي على مصر


و ببساطة
كلام أبويا الراجل الصعيدي المخضرم ربنا يديه الصحه يا رب
اللي كان قالهولي زمااااااااااان وانا صغننه فعلا صح
سألته وهو بيحكي عنها وعن زمان مجدها
كنت براها
شايفاها في سور القرآن ونشيد بلادي وصحبة الغرباء
وبس
سألته بكل اعتزاز _ علمهولي _ : يا بابا هيه مصر على كده تقدر تطلع الاولى في كل حاجه ؟؟ صح؟
قاللي : أيوه ... تقدر تطلع الأولى في كل حاجه
إلا البَـــوَظَــــان
بفتح الباء الواو والظاء