الخميس، مارس ٢٧، ٢٠٠٨

تـُــــوتـَـه

تِسمحيلي أعزِمِك الليله على حـَبّة سعاده ؟
والحساب مدفوع مُقدم
منك إنتي
ما إنتي عارفه
الديون دي مَزاج وعاده
والسعاده
مِنـِّي ليكي ... حاجه فاضيه
كلمتين من بنت راضيه
عنـِّك انتي
**************

طَبْ ثواني
شايفه واحد قلبُـه راكِـن صف تاني
نفسُه يسأل
عن جنون الحرف لو لخبط لساني
جالو دور ؟
يرضى فرع إزاي يا بنتي ع الجذور
ع الجذور ؟
ده الجِدْر شادِّك
يا أميره ... وحشه منك !!!
لأ يا صحبي
خللِّي عنك
أصلـُه مُش فاهم يا توته
قيمة البنُّوته عَندِك !!
**********
توته مين ؟
هوَّ أنا لسَّه مقولتش تُوته مين ؟
توته طبع الحسن في الوِش الحزين
توته معنى الحب لما الحب يبقا الدنيا مضروبه فـِــ سنين
توته في الكُرّاسه إملا
وكلمه حلوه
(وعشق فوق الأربعين )
توته دي القلم إللي عافر
لما نبض الحلم سافر
لجْل يبقا الحرف زين !
توته دي الحدوته .... هوَّ
لما شالها في قلبه جوّأ
ضحكه بين النُّغزتين
وإللي عارفه
إني انا وبس إللي عارفه
يعني إيه العمر يبقا كنز مِـ المحبوب ودين ..!
واختياري ....
لمَّا أول درس منها
كان لعقلي ولقراري
إحنا نختار ويَّا بعض
إزرعيني جوَّا حلمِك ... تُحضنك في الشدّه أرض
كل شوك الدنيا كدبه
بس صِدْق الدنيا ورد
ياااااااااااااااه يا توته
قلبي راضي كتير عليكي
وماشي في الدنيا برضاكي
بابا قاللّي العبد يرضى
طول ما رب العبد راضي
إوعي تنسي في يوم معادي
لما تبقا الجنه من تحتك وبابها ..... لسّه مقفول من قُُصادي
وأبقا خايفه
إغفريلي
واسمحيلي
أعزمك من تاني على حبة سعاده
تُوته يا سكر زياده
جوّا دمي
يجري باسم الغالية أمـــي !

هناك ١٣ تعليقًا:

basma saghir يقول...

:)

انتي جميلة قوي غلى فكرة

والكلام ده جميل..جميل قوي

محمد عبد الغفار يقول...

دار الشروق فين مدونة رشا عبد الرازق اهه

Unknown يقول...

رشا انتي موهوبة جدا في كتابة الشعر العامي وممكن اتكوني خليفة لنجم
swtalmokawmah@gmail.com

ســـــــهــــــــــر يقول...

يعني إيه العمر يبقا كنز مِـ المحبوب ودين ..!
------------------------
الجمله دى لوحدها قصيده
و هو فيه اجمل من ست الحبايب و دينها اللى ف رقبتنا للنهايه

رشا
دى مش اول زياره للروعه هنا
و ان شاء الله مش الاخيره

دكتور مستكنيص يقول...

جميلة اوي بجد وفيها تعبيرات عبقرية مش تقليدية يمكن بس لو ظبطتي فيها الوزن في بعض اللمناطق القليلة تبقي قصيدة مجرمة
من الاخر كده روعة

رئـــــيسـة حزب الأحلام يقول...

برافوا انا عمالة اسقفلك جامد كلمات اكتر من رائعة

رشا عبد الرازق يقول...

انتي الأجمل يا بيسو ربنا يخليكِ
ميرسي لذوقك

صباحك منور
:)

رشا عبد الرازق يقول...

محمد عبد الغفار
متعرفش مرورك ساعات عندي بيفرحني إزاي
ربنا يخليك يا سيدي
وقول يا رب
:)

رشا عبد الرازق يقول...

خليفة نجم يا محمد مره واحده ؟
طب إيدي على كتفك
بس المواهب في بلدنا بجد كتير خالص
لكن النجومية في نفس بلدنا ليها مقاييس تانية
تفتكر هينفع أتقاس بيها في يوم ؟
يا مسهل
تسلم :)

رشا عبد الرازق يقول...

مفيش أغلى منها
ولا أطيب منها
ولا أهم منها
كل أم كنز كبير
وتوته كنزي اللي الدنيا متساويهوش
سهر
كل سنه وانتي طيبة
وشكرا على تواجدك الذي يشرفني تواصله
تقبلي تحياتي :)

رشا عبد الرازق يقول...

دكتور مستكنيص ؟
إلا يعني إيه مستكنيص دي ؟
على كل لو حابب تخدمني
يبقا شاورلي على مناطق مشاكل الوزن إللي انت شفتها عشان أنا مش واخده بالي يمكن نعدلها ونقرب على الروعة
بجد
رأيك يسعدني
واهلا بيك في كل وقت
وشكرا على رأيك الكريم
تحياتي :)

رشا عبد الرازق يقول...

صقفتك وصلتني يا رئيسة حزب الاحلام
ويا رب اكون أستاهلها
أهلا بيكي وأشكر لك رقتك يا عزيزتي

تحياتي وتقديري :)

غير معرف يقول...

شكرا يا رشا على القصيدة الجميلة, بس في حاجة اجمل من القصيدة, وهي انك كتبتيها عن ست الحبايب , عن اغلى انسانة في حياتك-وحياتي انا كمان-
الانسانة اللي لو قضينا عمرنا كله نقول لها في شعر واغاني مش هانوفيها حقها, ربنا يخليهالنا يا رب , ويوفقك دايما
اخوكي: محمد عبد الرازق