وآآآآآه يا ضنايا آآه يا ابني

وآه يا ضنايا آه يا ابني
تِموت في العمر كام مره ؟
وليه من مره ولا مره
مترجعشي
لحضن امك
طب ارجع حتى لو ميت
حشايا يا ابني آه يا ابني
حشايا الصاحي بيعيط
لو ألمِْس في الوداع دمك
وأبوس راسَكْ
لو أحفر قبري ليه قبرك يكون مِنْداس ما بين ناسك يكون النار
يكون الدَّم ع السكين
يكون البحر في النَوَّه اللي مكتوبه بايدين غدَّار
وبَتْمَصْمَصْ عليك الخسَّه ميت خيبه
وميت زَمَّار

وآه يا ضنايا آه يا ابني
وآه م البحر فين وداك ؟
وأخدك تاني ليه منِّي
زمان القطر مرّه هناك
حَكَم بالنار يموتني
حرق عمرك وفاتْلي العيد يكون وخْزةْ فَرَحْ تِضْنِي

وجَهْ السفاح
هَجَمْ ع الليل بِسِلْسالُه
هدر دمّك وقال مالُه
يموت هوَّ
يعيش غيرُه
وايه يسوى الحمام للصقر لو حَدَف الغراب طيرُه ؟

وآه يا ضنايا
آآآه يا ضنايا
آآآآه يا فرحه مسروقه
يا ذنبي اللي مش ذنبي لكن سكينه مَرْشُوقه

في جمب الفقر واللُّقمه اللي موتك بيها شرَّقني
عروستك جمبي أهي يا ابني
وبتقولِّي يغور المهر
منيش عايزاها طَرْحَه بِتُلْ
دي كِسْرة عيش بايد أمي نغمِّسْها ولو بالذُّل
تِكَفِّينا
ومن امْتى الفقير لو جاع بيشكي ولو غموسه الهَمْ

هتبقى اهون على جوفنا من المر اللي مِتْعاص دمْ
خلاص يا ابني
مفيش فرحه وزغروتَه
نهاية الحلم جت بدري وزي الطُّوبه محْطُوطَه
في قلب أُمَّك
ومين يا ضنايا يِدْفعلي تَمن دمَّك

ومين هياخدلي بالتَّار اللي مِتْحوش سنين عندك

وليه الذنب يوم ما يِصيب وطن مِتْهان
يسدد في الحساب غلبان
وتِتْحسر عليه أُمك