السهل حبك ممتَنع
والدمع في جفونك حكاية فيها صدق ومُبْتَدَعْ
وعشان انا قبلك كتير
دُقْتك كتير
مليووون وجع
فمفيش لزوم للآهة دي
أهو طير عِلي ...وعلَّا... ووقع
....واسمع هقولك كلمتين
ويا بخت مين حس وسمع
.
.
.
.
.
.
.
في الصورة لما أطلع أنا تصبح شموس الكون حَلق
والبرد يعمل عملُتُه ويشد في خناق الزهق
وأكسب ...... مليش ذنب في كدا
غير الدفا وصد الندا
والحرف يبدأ رقصتُه على نبضك انت اللي اتسرق
وأسمع حكايتك من آخرها وانتهي بالمبتدأ
وأعشق ..... وآآه م اللي انتهى بالعشق جمب اللي اتعشق
واما أسألك عن حلمنا
والمرسى فوق شط انتصارك بالأماني في بحرنا
ألقاك بتركب مركبة عدت وحنت للغرق
والصورة تغرب كلها
باللي انطفا واللي اتحرق
وتبصلي في ساعتك بخوف
وتِعدِّلي في كل الحقايق بالدقايق والحروف
وتقولي مش أقادر أكونلك وانت مش قادر تشوف
في السكة مين عدا وسبق
في الصورة مين بروز شريطُهُ وهو حي ومين رشق
سهمك ومين فينا اترشق
وانا ليه هعيط لو هكون ضلاية لو صورتك ورق
هناك ٧ تعليقات:
اسلوبك جميل ورقيق وينم عن جرح غااااائر او حزن دفين
لكي مني كل الاحترام والتقدير
ميرو
انا مريت من هنا
كلامك جميل... و ع الدواق بجد
انا مبسوك اوي اني لقيت مدونتك
الناي الحزين شكرا على اطرائك ومرورك ورايك الرقيق
ممدوح ... اهلا بك ... شرفت انا بمرورك وشكرا على سخاء ردك ... بس عندي استفسار ... بما انك كنت فعلا تقصد (مصابر ) مش ( مثابر) يبقا انت بردو هنا تقصد ( مبسوك مش مبسوط) لو كده يبقا يعني ايه مبسوك ؟ :) للعلم يعني بس :) تحياتي لك
كلماتك فعلا من السهل الممتنع
اسلوب جذاب
ومش عادى
مع انك بنت عادية جدا :)
طول عمري لا افقة في الزجل او الشعر
ربما عقدة من الطفولة نتيجة ان ورق السنتدوتشان من عربية الفول كان غالبة اشعار و الفول كان مسوس فاقترن الطعم بالشعر
لكن حقيقي كتاباتك لها طعم اخر اقرب للكنافة بالقشطة يذوب سريعا في العقل
رائعة كعادتك
شمعي ..:) اهلا بك
وشكرا على رأيك الكريم واتمنى ان نكون عند حسن الظن يا رب
جعااااااااااان :)
يسعدني رأيك جدا
لاني تقريبا اعلم رأيك في الشعر وعموم الشعراء
يبقا دي شهادة كبيييييييرة جدا بجد منك ويا رب اكون أستحقها
انت منورني فعلا :)
إرسال تعليق