حمَّـــال الأسـيَّـة

ولما أبدأ

أخط الخط بتزوق

وتندهني يا ناس روحي

وبتلزق

عشان أفرح

ويجري الفرح م المطرح

أروح ماسكاه

وأقوله : متختشي مره

ولو سرقه

ده أنا هنطق

يقول : ماشي عشان تُرزَق

ويعملي كمان قهوة

ويفرد ع الجبين ورقه

ويكتبني بخط أزرق

يا بايخ زي يوم العيد اذا عدا بدون فستان

خلاص يعني مهنش عليك تفوتلي بالتة الألوان

؟؟؟؟؟؟

يقولي اللون ده من توبك

ومولود الكلام عنوان

خلاص يا فصيح هتتفلسف

كفاية تجود عشان أعرف

بإني لسه جوا حروف

ولسه بخاف

ولسه من إللي جاي بتشاف

ولسه بحن للدقه إللي وسط البرد تبقا لحاف

ولسه بقول أنا بنتك

يا بحار....والزمن مجداف

.........

وبيزمزق أهو مني

هيمشي خلاص

ثواني لسه فيه كلمة فِـ قلبي لجل لأغلى الناس

وحشتوني

ملامحي زي ما هيه

وصوتي بالكلام غيه

عيوني ع الشطوط لكن

نصيب قلبي معديه

وفرح قليل

وحشتوني

يا رنة عمري بالمواويل

بيرميلي الفرح منديل

خلاص ماشي

؟؟!!!!

أكيد راجع

دا حمَّال الأسية يشيل

لا تقاطعني رجاءاً

لا تقاطعني رجاءاً
حين أكتب لك حرفا يتشابك في حرف ، ليخط كلمة من بعدها كلمة وكلمة .....وسطرإالى صفحات

من ثرثراتي
حتى لا أتذكر طقوس الصمت التي تعلمتها حد الإجادة

بأصعب الأدوات

لا تقاطعني رجاءاً
حين أضع في خلفية اللحظة تلك الموسيقى التي كانت تحمل لي _ دون موعد _ صوتك
حتى لا أعود إلى موسيقى اللا صوت ....

في كل الألحان التي أسمعها دوما

ولست تأتي بعدها

لا تقاطعني رجاءاً
حين أعقص ضفيرة من الإحساس العذري

وأنطلق بلا حد في تلك الحقول التي كنتَ دوما خلفها ....

تراني
حتى لا أعتكف في صحرائي من جديد ...

كي لا تراني

لا تقاطعني رجاءاً
حين أستسلم لتلك الرجفة التي تنهض بالإحساس الى حافة السماء

وتخلق في عنفوان الربيع أجمل إسم لكل الأشياء التي لا تُسمَّى
حتى لا أقسم على نفسي أنني أرتجف فقط

... لإطلالة الشتاء

لا تقاطعني رجاءاً
حين أسامر أبيات شعري التي انتظمت على أوزان حبك وصاغت أسطورة لقائك وفقدك ...

وأَمِنَتْ ...

حين آمنت أنها قد هُزمت يوم هزمنا القدر
حتى لا أستيقظ على آخر بيت أخبرتني

فيه أنك الحلم الذي تركني

بعد أعظم عهد باللقاء

!!

يــا ربـنـَّـــــا

يا ربنَّا
من ييجي كام مليون سنه بَعْصاك وقلبي بيهجُرك
من أد إيه بوعد ومش بوفي وتدعيني وانا بستمْهِلَك
واما تناديني الأمنية
بِرضاك

تاخدني المعصية
وتلف بيَّه الدايره أشكي التوهة وأرجع أحنلَك

يا ربنَّا
لوفاتت الأيام عليَّه سنين بتسرق بعضها
لما تلاقيني بمد إيدي لحب غيرك رُدَّها
الخوف على الدنيا انكتب
والضعف ليه مليون سبب
وانت القوي فوق الخطايا وفوق سمانا وأرضها

يا ربنَّا
أنا مش بعيط لجل ليله تعدي وأرتاح بالدموع
زوَّادي يبقا القرب وأبعد واشتري بالدنيا جوع
لو ضلم الاحساس أوي
اشرق على قلبي القوي
واحيي اللي مات قَبْلِنْ يموت اللي مَيِمْلِكْشِ الرجوع

يا ربنَّا
يا اللي متصعبشي الهدايه عليك وقادر ع القدر
يا اللي مبتردش دُعايا وانت أقرب للبشر
من ضمة الروح للوريد
من فرحة الصايم بعيد
اجبر طريق اللي عرف معنى الكمال لما انكسر

حوانـيت الكــلام ... قـفلـــتْ

وداريني

من الحلم اللي متلخبط على وش الكلام داري

وخليني

أكمل سكتي مش خايفه م الآخر في مشواري

نطير والأرض تبقا جناح

أنا عايزه اللي جاي فرحه على جبين النصيب ترتاح

و(ممنوع) الفراق كلُّه

ولو خيط الوصال مغزول بأوجاعنا في توب ضلُّه

وممنوع في الغرق موتي

مدام مسك الشراع ملاح

!أنا مش أد يا بحر الغرام غدرك

ولا في برّك......

لقاني وراح

ولا أد الجراح تتمس

يا راسم كلمتينَك غنوة مرصوصه في سِياجَك رص

متسألنيش عن القمر اللي مش قادر يكون فرحان

ولا قادر كمان يحزن

و تتعصب أوي جدا

عشان الضحكة لو قامت على كتاف الأدان تدّن

يقوم الفجر لو باهت

لكن بايت....

بخير جدا

لا طال حلمُه...

ولا طال النهار موجوعْ

....

....

....

....

....

حوانيت الكلام قفلتْ

وباعت للقلوب الوقت

(عزيز عيني)

على عيني ....

يكون الحلم مش دلوقت

بَــواقِــي طُفُــولْتـِــي

بودع فيك بواقي طفولتي يا صحبي
واعاتبك ليه
وداعك فيه رضا ربي
وداعك كان معاد مكتوب على جبينك ومتخبي
ومكتوبي خلاص أكبر
وانا جواك يا دوب بحبي
يا نن العين
أنا هيه
اللي شدت خطوها بعمرك
عشان عود الشباب يتشد
اللي كانت سانده أحلامها على كتافك
ومتحاوط عليها بسد
اللي عاشت بيك كلام تاني
معاك اتقال
وفيها اتمد
أنا "الحدوته" ...و"الدلوعه"....و"الضحكه اللي زي الورد
"أنا وسط البنات بنتك
على قولك " يا دوب البنت "
عرفت ازاي يا صحبي كبرت
عرفت ازاي أنا هيه
!اللي صحيت فجأه
عرفت فجأة
فين وقف الحنان ووقفت
من الساعه اللي لما ناديت عليك فيها ولما سكت
وبُست عنيك
عارفها عنيك
؟
على مرايتي هشوفها كتير وطول ما الضي ده في عيني
وليه يا وشوش بتبكي عليه وليه عماله تبكيني
محدش فيك يا أغلى الناس يطبطب أو يعزِّيني
عشان دمعي اتحبس على مُجريات كِتفك
وكتفك فين
؟
عشان منتش يا دوب بابا
ولا حزني عليك آهه اذا طالت تكون حرفين
ولا نار الفراق بركان
بواقي طفولتي كانت فارس الفرسان
كانت حضني اللي بيك دفيان
ومية حب ترويني ومتملش من العطشان
كانت شِعري
اذا قُلته
عشان يرضيك ولمُت عليه
كانت خوفي اذا اتحجج عشان بإيديك تُطُل عليه
ويتمايل على ضفرتين
بواقي طفولتي في وداعك
بودعها وأشيلهالك
على معادنا
في نن العين

توفى إلى رحمة الله تعالى والد الأستاذة رشا

إنا لله وإنا إليه راجعون

توفى إلى رحمة الله تعالى والد الأستاذة رشا

نسألكم الدعاء له بالرحمة ولأهله بالصبر والسلوان

أصعب الحاجات

إنك تبقا واثق ومتاكد إنك بتبذل أقصى جهد مع نفسك ... مع دماغك .... مع وقتك ... في شغلك ... مع اهلك ... مع قلمك ....

تبقا واثق ومتاكد إنك بتستنفذ أقصى طاقاتك

وبينك وبين نفسك تبقا عارف ومتأكد إن ده مش كفايه ...

وإن شكلك بيعكس غير كده

وإنك بتأكد بعكس الحقيقي اللي هو صدقك وآخر ما عندك

حاجات

مينفعش تحلف عليها

مينفعش تتصدق إلا بالنتائج

إلا هيه مش بإيدك

وفي الآخر

تصدق إنك مقصر جدا في كل ده ...... تصدق ... وإنت بس إللي عارف ... إن دي مش الحقيقة

......................

......................

......................

......................

إنك تستعبط .... وتعمل مش عارف إيه اللي ناقصك ...

لأ ... وتحلف للناس ويمكن لجواك كمان

إنك فعلا مرتاح كده ... مع إن يمكن كده هو مشكلتك ...

يصدقوك ... مش عشان شكلك بيقول إنك مش بتكدب ...

بس يمكن عشان هم عايزيني يصدقوا

يمكن لما يصدقوك هيستريحوا ....

وده اللي إنت كتير بتبقا محتاجله ... عشان متفتكرش

.......................

.......................

.......................

.......................

إنك تبقا عارف إنك مركز أوي في حاجات مش هتمشي غير لو بطلت تركز فيها أوي .... ...

ومهما ركزت اكتر مش هيحصل منها إلا على أد ما بيحصل .....

وتلوم نفسك بالجامد جدا .... عشان إنت مش بتركز في بقية الحاجات......

المهمة

وانت مش خايف من الحاجات ... إنت خايف من لحظات التركيز فيها

......................

......................

.....................

......................

إنك تبقا لوحدك أوي ............ والناس كتير

بفتح البــاء ... والــواو ...... والظـــاء

شفتو ميس ايجبت السنه دي ؟
لأ ؟
ولا أنا
طب شفتو مستر ايجبت السنه دي ؟
لأ
ولا انا

أصل أنا رجعيه

ومفهومي عن الرجاله لسه مختلف

طب شوفتو ميس ايجبت السنين اللي قبل كده
لأ
انا شفتها

طب للي شاف ومشفاش

كلنا عارفين قطعا
طب بلاش

شفتو أ. وائل الابراشي في برنامج الحقيقه
أنا شفت
وطبعا كلكم شفتوالحلقه وسمعتوها
أهي بجد بجد
هيه دي المهازل
مهازل بجد

أب ... محموق أوي
ثائر
هائج
يتهم الجميع لان ابنته ظهرت على صفحات المجلات في ثوب لا يغطيها
لكنه يؤمن
وبنفس الحمقه
أن من حقها ان تحلم ان تصبح ملكة

ملكه في ايه يا عم الحج الحمش ؟؟ محموق ليه مدام
مفيش مانع انها تلبس مايوه قطعتين جوا المسابقة وامام لجنة التحكيم وفي الحفلات

آآآآآه
محموق أوي عشان دخل اللوبي بتاع الفندق فلقى ملكات الجمال وفتيان الوسامه خلطبيطه
تقريبا حد كان قايله انه هيبقى فيه محرم مع الأموره
مصدوم جدا رغم أنه شايف ان البنت من حقها تتسابق على جمالها وانوثتها والناس الوحشين الشياطين هم اللي أساؤوا استغلالها
مع اني الصوره بتاع بنته كانت نموذج للاتقان الصراحه ولا عارضات الأزياء

يعني محدش كتفها

لأ

وبيستشهد ان عبد الناصر حلق لفتيان الجمال ع الزيرو ووداهم الجيش

دي الرجوله

لكن البنت

وماله

مدام مربيها كويس

خلاص يا عم الكويس يبقا زمايلها يطلعولها الأوضه ميطلعوش تعبان ليه

هيه هتتصرف

مدام التربيه الأخلاقية الصارمه هتحميها لو في قلب آتون

أمال محموق ليه يا بيه ؟

متزعلش

ان شاء الله تفوز المره الجايه يا سيدي الصابرين بخير

... طب يا ريتك كنت قلت انك مؤمن بقلة الحيا

بجد

كنت هحترمك أكتر

مش اكتر يعني أوي بصراحه

بس على الأقل أهو كان هيبقا عندك شيء مؤمن بيه حتى لو كان الشيء ده الغلط في أكمل الصور
ومكنش يبقا فيه لازمه
للردح للاهالي التانيين اللي جايين يتهموا المصريين بالجهل عشان مش فاهمين البعد الثقافي الخطير لفتى مصر وفتاة مصر
يا حلاوه يا ولاد
هم الناس دي منين ؟
مين دول

ومين دوكهم ؟ أكيد أكيد
دول الزمن ده .... دول الجهل
الجهل بكل شيء
الجهل بالدين
الجهل بالأخلاق
الجهل بالأعراف
الجهل بالعلم
الجهل حتى بقلة الأدب
أيوه والله
حتى قلة الادب مش عارفين يعملوها صح
عشان كده بقينا عاملين زي اللي رقصوا على السلم
يا شيخ جاتكو ستين خيبه على خيبه
اللي قالو المسابقة ثقافة
واللي قالوا عليها حلوه ومهمه ولذيذه .. بس التنظيم هو العيب والعيبه

مش قادرين لا دول ولا دول يفهمو ان مسابقات الجمال اللي بتتعمل في أوروربا وامريكا
مسابقات من قلب المجتمع والبيئه
ليها مرجعية
بصرف النظر اذا كنا متفقين مع المرجعية دي واللا لأ
مش مهم
مهياش بتاعتنا بتاعتهم هم وبيعملوها صح

انما احنا لأ

زي اللي بيلومو على اسرائيل انها بتقتل الأبرياء

واسرائيل بتدافع عن اللي دينها وميعادها المزعوم من وجهة نظرها وبتربي ولادها على كده وولادها بيعملو بكده

لكن العيب فينا احنا

عشان احنا بنتكسف ندافع عن الدين اللي لينا ونقول ان احنا بيه وهو فينا

فبنخسر

عشان احنا مش عايزين نؤمن باللي يخلينا نكسب ومنخافش ونقف للي ظالمينا من جوا ومن بره

وبالمثل

المستوردات دي مش بتاعتنا
مش هنعرف نظبطها
عشان احنا مرجعياتنا مختلفة
بالنسبه لأوروبا وامريكا دي ثقافة
عادي يعني
محدش مستغربها ولا مختلف على كيفيتها
لكن بالنسبة لينا دي جزء من الامراض الطفيلية الكتيره اللي بتنخور فينا عشان احنا ببساطة مش عارفين نعمل أي حاجه بجد
من اللي بنعرف نعملها ولايقه علينا
العلم لايق أوي على مصر
الدين اللي بجد _ أيا كان _ لا يق جدا على مصر
قهاوي الشعراء والأدباء والساسه اللي بتطبع عمالقه ورموز لايقه جدا على مصر
نجيب محفوظ واحسان عبد القدوس وأم كلثوم لاقين جدا على مصر
اتحادات الطلبه ومظاهراتهم وجسارة قلوبهم واحلامهم العريضه لايقه جدا على مصر
الرياضة والكورة لايقين جدا على مصر

الصحافه الحره بجد لايقه جدا على مصر
النكته ..... وخفة الدم ...... الطيبة والبساطة والرغيف السخن وحضن الأم

ويا عم سلمها لربك بكره تفرج ....

متيجي تشرب شاي ... واهلا وسهلــ ــمبك

.... ووالغيط والمصنع والرجاله اللي بجد
كل ده لايق أوي على مصر

و ببساطة
كلام أبويا الراجل الصعيدي المخضرم ربنا يديه الصحه يا رب

اللي كان قالهولي زمااااااااااان وانا صغننه فعلا صح
سألته وهو بيحكي عنها وعن زمان مجدها
كنت براها
شايفاها في سور القرآن ونشيد بلادي وصحبة الغرباء
وبس
سألته بكل اعتزاز _ علمهولي _ : يا بابا هيه مصر على كده تقدر تطلع الاولى في كل حاجه ؟؟ صح؟
قاللي : أيوه ... تقدر تطلع الأولى في كل حاجه

إلا البَـــوَظَــــان

بفتح الباء الواو والظاء

يا سجانى

يا سجاني
أنا ساكن ورا قُضْبانك الجاني
حديد قاسي
حصير من شوك
وعيش ناشف
وأحزاني ....
وإنت في بُرجَكْ العالي
بطوب مشقوق
على حيطاني
هتعلى لفين ؟؟
سماك سابعه ؟
وناسي إنْ فيه سبعه
لتحت الأرض لو عايز ....
مداس ....
هتدوس على الفاني

أنا المسجون
ومِتْكَتِّفْ
وكُرْباجَكْ على ضهري

أنا المحروم من الخطوة الليِّ بتسابقك
عشان تِجْري
أنا في عنيك مليش قُدْرَه
سرقت السيف على حصاني
لكن انت اللي بتفكر بخوف مسجون ومش هاني
وعارف إني من سجنك
أنا الحرّ اللي بيعاني
أنين صبري بيسبقني
وبيعلم في أوطاني
وصوت إبني هيتكلم
داــنا مربيه على لساني
وإنتَ ؟؟
هتنتهي عَنْدَكْ
سجين والسجن جوَّاني
هتعلى لفين ؟
لآخر حد ؟؟
هينزل بيك سحاب أسود
مهوش نازل بلون تاني
ونار هتطَّهرالبنيان
من إللي بناهْ
وسجاني