الخميس، يناير 27، 2011

أيــْـوا كــَـشْ






أيوا كــَشْ
بس لسه الخوف ما مـْتـش
لسه بينا ناس بِـتِـدْفن جــَرْح جُــوَّا الطيبة خــَشْ
لسه فينا ناس بــِتاكُــل
ناس بــِتـِشْـرَب
ناس بِــتـِلْبـِسْ توب مَهوش مَغــْزول بــِقَــشْ
لسه فينا ناس بِـتِـضْحَك
ضِحْــكة سُــودة
تـُعـصر الدَّمعه فـِ سُـكوتـَها
تـُحضُن الآهة الوَدودَة
آهة .... مــِش على قـَد خَــدْش
صابره جداً
صابره جداً
واحنا شئنا
واللا شاء الرب خــِيرة الجُــنْـد فعلاً
سـِيفنا بره الغمد وقت الشِّـده سَـدْ وما ارتـَعـَش
سـِيفنا زي غضبنا مارد
كل واحد فينا ساكن جـُّـوا مــنـّـُه ألف واحد
ألف فارس مَـتوَلَـدْش
والجنود محتاجه قائد
والقيادة متتشـَحَتـْش
تـِتْخلق لما الحياة تـِتساوى ويـّا الموت بـِقرش
واحنا بين العيب وميزتـُه
موجة بـِتعافر في تـُقـْل البحر وفي قـوة شريعتـُه
تِـتْقـِِلِب على صخره فاكره ....
إنها مَـبْـتـتْـكِسـِرش !
يا شبح خيّـم على سطوح الحواري والنجوع
يا برودة عضم بـِتْـنخور مع الأحزان ضلوع
يا وجع مَـبيرتِـجـِعْـش
يا ابتسامتنا اللي غابت والدموع مبتتمـِسِحْـش
ليه نخاف عـَ العمر واحنا
صفر فيه مَـبِـيِتْـحِـسبش؟
ليه يـِدادي الغول جـِراحنا
والغيلان مبتتعاشـِرش
يا جبان يا قلبي بُكره
غصب عنك جَيْ جَيْ
تبقا واحد في المظاهرة
تبقا ميِّـت
تبقا حَـيْ
تبقا أول في امتحانك
واللا حلم ميتجاوبش
تبقا سمكه في بحر واسع
والللا سمكه فــِ بطن قرش؟

الأحد، يناير 23، 2011

حـَـجـاتـي الـِّـلـي بَـخاف مـِنـْـها

ما بين النـُّومَه والصـَّحَـيـان
وبين حضن الدَّفـا الطالـِل على القلب اللي بات بردان
لقيتني وسط دايرةْ نور
وفستاني الطويل أبيض
في إسـْوِرْتـُه زُرار مَـفـْكوك
وفي الكــُولـَه وجع مَربوط
بقلب احتار
عشان يــُنبـُضْ
وشال وردي ...فوقيه دمعة
وضيْ بعيد بــِيـِتمايل
لكن مـُشْ شمس
ولا شَـمْعه
وصوت بينادي مره أحـِسـُّه بـِيقــَّـرب
ومره كأنـِّي مُـش سامعه
وشنطه راكـنـَه فوق كـِـتـْـفي
كانت فاضية
لكن حاسَّـاها تُــقـْل الصخره شايلاها
ومُـش راضيه
....الخُـطى تِـمْشي
لِحَـد الصوت
وبـَرجِــف موت !
حروف عَـمـَّـاله تِـتْـرتـِّـب
كلام مِــش عارفه كان داخل لِـجُوَّايـا عشان أكتب ؟
خلاص مَــكتــِب
مليت قلمي،، وفوق الشال
كتبت اللي اتـْـفـرَد جُـوايا واللي سِـمِـعْـتـُه مـِ اللي اتـْقال
ما بين أقواس
"مـَتـِقـْسيش ع اللي عاشـقـيـنِــك من الدنيا وعاشقــِنـْها
وايه في الشنطه جُـوَّا الدايره فاضل يِـبْـعِـدك عِـنْها
حاجات راحت ...
خلاص راحت ....
حاجاتــِك !! متخافيش منها "
وفجأة الإسْـورة اتْـقَـفـَلِــتْ
يادوب بيني وبين الشـُّوف رموش عيني إذا اتْـرَفـَعـِت
خـيال الضَّـي بِـيقـَّرب
وعايزه أفضل
وعايزه أهرب
وعايزه أعيش
وبان الصوت:
أنا فاضل هنا جَمـْبـِك
مَتـِتاخديش
وزاد الصُّوت
ومكسوف الهوى من حُــسن أحلامـِك
متتكسفيش
ورقْ الصّوت:
أنا وعد اتـْقـَسم ليكي
ومين قالـِّـك مَتـِتـْوْعديش
وفاض الصوت:
مفيش حاجه نخاف منها
هحاول
وانتي مَـتـْقاوْحيش
هحاول وانتي مَـتـْقاوْحيش
هحاول
وانتي
مـَـ
ـتـْـ
ــقـاو
حيــــــش

وفجأه صِـحيت
!!!!!