الأحد، يوليو ٢٧، ٢٠٠٨

من الفراخ .... للبريء !! ممدوح اسماعيل

ارجع بقا
وارفع ايديك
لأعلى شبر في السما
منصور يا بيه
التهمة كانت يعني إيه
حَبِّـة فراخ واتـْفَـرْفـَطو في المّيـَّه ريشهُم يِسوى إيه؟
الموج كتير
قادر يـِلَمْلِمْ كل يوم مليون فقير
بس الكبير
يفضل كبير
أما الصُّـغَيّـَّر يِنْـدِعِـق
مَتِوْجعوش راس الأمير
ووسَّعوا للمحترم
راجع على كفوف العلم
بِيْبـُص من فوق العِمم
ويقول أنا
زي الهرم
عايش وهفضل بالسكوت
ولمَّا أموت
مش هندفن وسط الحيتان
هيشيّعوني في صـَوْلـَجان
الموت لِـنا
أصله بتمن !
مش زيكم
الأرض دي مش أرضكم
ما تموتو عريتو الزمن
والله عندك حق يا ابن المجرمين
الشحاتين
هيعيشو ديما ميتين
ايه يفرق العمر المـَهين
لو ينتهي
من غير كفن !
العدل نعل في جزمتك
ارجع وكمل سكتك
بردو التُراب
بيشيل عَفن !
إحلم في حجر مِخَدِّتك
واحدف فـِ حجرك فرختك
مبروك عليك ....
باضت وطن !







هناك ٣٦ تعليقًا:

محمد عبد الغفار يقول...

ما كل هذه الرشاقة

غير معرف يقول...

يا ساتر يا رشا, يا بنتي انا اتصدمت فيكي فعلا! من امتى بتهتمي بالتفاهات دي؟! ايه يعني 1100 فرخة يموتوا في عرض البحر؟! يطلعوا كام قفص يعني؟؟ انتي عارفة طبعا ان دي سكتي وانا مربي دواجن سابق!!! المهم انا كنت منتظر انك تراعي الاحداث العصيبة اللي بتمر بيها البلد, البلد دلوقتي حزينة ومش فايقة للتفاهات دي يا رشا, يوسف شاهين ماااااااااات يا رشا, ومصر حزينة عليه يا رشا, -ثواني هامسح دموعي وارجعلك- المهم يا رشا زي ما قلتلك ال 110 فرخة يتعوضواان شاء الله, وانتي اكيد فاكرة يا رشا اني لما كنت عامل مزرعة الفراخ كنت باطلع 5000 فرخة كل شهر ونص ,وكان النافق بتاعهم بيكون تقريبا الف الف ومية على حسب الجو ونوعية المرض نسبة غباء العامل ونسبة فشل صاحب المزرعة اصلا, يعني اللي ماتوا دول يطلعوا نافق دورة من بتوعي, واهم كده كده نفقوا, ودورة تانية تعوضعهم, انما يوسف شاهين يا رشا- ثواني امسح دموعي تاني- يو سف شاهين يارشا ما يتعوضش, مصر خسرته وجهنم كسبته, يا بختك يا جهنم بالقيمة الكبيرة اللي كسبتيها ويا بختك يا جنة الخلد بشوية الفراخ اللي راحولك, واما الا لسه ما راحوش هنا ولا هنا فليهم رب اسمه الكريم
حسبنا الله ونعم الوكيل
مع خالص تحياتي وحبي
اخوكي الكبير -في السن بس- محمد عبد الرازق

حزينه يقول...

والله ما عارفه اقول ايه


بس مش تبقى مصر الا لما يحصل فيها كدة


رحم الله موتانا

وصبر اهل الموتى على الفراق والظلم



ح
ز
ي
ن
ة

غير معرف يقول...

تصدقى يا رشا أنا كنت ناسيه انه الحكم صدر القصيدة بتاعتك دى فكرتنى أروح أشوف ايه حيثيات البراءة
يالا حانقول ايه
حسبى الله و نعم الوكيل بعد كل ده و فى الآخر براءة

!!! عارفة ... مش عارف ليه يقول...

طلعتي السخرية
من رحم المعاناة

في ابتسامة صحيح بعد ما قريت
بس ابتسامة قميئة

عارفة

فكرتيني بعم بيرم
لما كتب المجلس البلدي

تحياتي
وليد

blue-wave يقول...

بجد بجد عجبنى البوست جدااااااااا
تسلم ايدك

سـردية يقول...

أول زيارة
ياه... يا قمر مين قسمك

متزعليش على إللي راحوا... وفري حزنك على من سيلحقون بهم... فالخراب قادم والبلد دي رايحة في ستين داهية... إلا إذا... ولا بلاش احلام؟

اسلام صديق يقول...

لهذه الدرجة اصبح الانسان رخيص



اللهم انتقم من الظالمين والمفسدين



تحياتي لكي شعر اكثر من رائع

محمد شوشة يقول...

السلام عليكم
هذه اول زيارة لى
واعتقد لن تكون الاخيرة
بجد المدونة عجبتنى جدا
اتمنى اقتبس الشعر ده فى مدونتى

ارجوا الرد السريع بالموافقة

جزاك الله خيرا

رشا عبد الرازق يقول...

محمد عبد الغفار :)
دعني أصفق الآن لنفسي يا صديقي
فقد مررت من هنا وتركت تحيتك :)

شكرا جزيلا لرشاقة خطاك بالحضور :)

رشا عبد الرازق يقول...

أخي الكبير الحبيب محمد
يعني لازم تربط الأحداث ببعضها وتستعيد على حس ممدوح إسماعيل ذكريات مجدك الضائع في مزرعتك العبقرية !!!
يا باشا خللي الطابق مسطور ومتفضحش الصعايدة .....
وخلينا دلوقتي في فرختنا _ قصدي فرحتنا _ المجيدة ببراءة ممدوح بيك اللي أنا عارفه ان فراق جو نغصها عليك وعلى الشعب المصري كله !!

وانت يا حماده لا تعيط ولا تشد في شعرك ولا تفتكر فراخك ولا فراخ المصريين ولا تزعل نفسك خالص




شوف
هو حسبنا الله ونعم الوكيل :(

منورني ديما يا محمد

رشا عبد الرازق يقول...

حزينة
إسمك موجع
يا ترى صح تكون أسماينا شبهنا أوي كده ؟
ولا هيه مشاعرنا اللي غلبتنا لحد كده ؟
مش عارفه أقولك سلامتك من الحزن
لأن كلنا بندور على السلامة دي في كل لحظة في أرض الامن والامان
واللي حاسه إن ربنا نزع منها الأمن
وهو المستعان يا عزيزتي
شكرا لمرورك واهلا بك :)

رشا عبد الرازق يقول...

شفتي حيثيات البراءة ؟
ومن غير ما تشوفيها
الكل بريء
طالما اللي راح إحنا
تخيلي
جريمة ومأساة بالحجم ده وميتحكمش غير على شخص واحد ب 10000 جنيه
يا بلاش !!!
حيثيات البراءة واللا حيثيات المهانة
اللي خلت شعب تعداده تخطى ال 80 مليون مش قادر يقول آي بصوت مسموع
تفتكري من كام سنه بيترتب لأننا نموت من الجوع فصوتنا يروح ونورح معاه
كده
بموجة بحر في غلطة قدرية كان القدر مش لاقي أبرياء غير نا عشان كل ألف يفدوا واحد بالموت ؟

هتفرق إيه حيثيات البراءة
كلمة بريء في السطر ده
تكسف !!!

شكرا لكِ

رشا عبد الرازق يقول...

وليد
شرفتني
بيرم مره واحده ؟
ربنا يكرمك يا رب ويجزيك ألف خير

بس شفت بيرم من كام عقد قال إيه في الآخر ؟
قال :

يا بائعَ الفجلِ بالمِلِّيـمِ واحدةً

كم للعيالِ وكم للمجلسِ البلدي


دلوقتي بقا لا عاد فيه فجل ولا مليم ولا حتى جنيه ولا حتى بلدي
هو يا دوب كفاية ورضا اوي على بقاء
المجلس !!!

ربنا يرحم بيرم
ويرحمنا

شكرا لك مجددا :)

رشا عبد الرازق يقول...

دكتور عمرو
شكرا على مرورك الثاني وعلى رأيك الكريم الذي تسعد به كلماتي أيما سعادة
تقبل وافر تقديري :)

رشا عبد الرازق يقول...

( أول زيارة
ياه... يا قمر مين قسمك )

شريف الصيفي
فلتكن الأولى ... ليكن من بعدها مرات بلا آخر ... ولي الشرف
القمر اتقسم لما نص التمام حَلْ :)

أما اللي راحوا
فالحزن عليهم خزي
واللي رايحين مباقوش بعيد عننا عشان نشيل الحزن ليهم
مبقوش ورا شاشات التلفزيون والاخبار البعيدة
اللي رايحين أقربأوي من كلمة "إحنا "
و
كده بمنتهى البساطة
سوري
بمنتهى البراءة !!!

الحلم يا شريف عايز فجر يطلع بيه
والفجر عايز ناس تصحى وتصحيه !


خالص تقديري لتواجدك :)

رشا عبد الرازق يقول...

اللهم آمين

أخي الأفغاني شكرا لرأيك وأتمنى ان تكون المدونة والكلمات دوما عند حسن الظن اهلا لكل من تلقَّى :)

رشا عبد الرازق يقول...

عربي يعيش في مصر

اهلا وسهلا بك ويسعدني أن تروقك المدونة
وعلى الرحب والسعة طبعا هنا وهناك

يسعدني تواصلك ولك تحياتي وامتناني لذوقك :)

admelmasry يقول...

مممم
مش حلوة
.
.
اسف فعلا
بس مش دي رشا عبد الرازق الشاعرة
اظاهر ان الحماس والجلالة خدتك وكنت عايزة تكتبي
.
.
انا عارف ان جواكي احسن من كدا بس اوعي تنجرفي ورا الفكرة حتي لو كانت ليها شعبية
.
.
اعتذر مرة اخري والسلام
.
.
.
ملحوظة
اسمي ادم المصري
وليس كاتب مصري

رشا عبد الرازق يقول...

آدم المصري
تحياتي لك
:)

وشكرا على رأيك الذي أقدره بالطبع
والشعر تحديدا أذواق يا عزيزي فلك كل الحق أن يعجبك نص ولا يعجبك آخر
وارد أن يتفاوت المستوى من وجهة نظر المتلقي
ووارد أيضا
أن يمسسه نص ولا يستشعر آخر
وإن كنت أتصور إن لمأساة العبارة المستمرة بالنتائج حتى الآن ( جلالة ) مست كل المصريين .... ووجعتهم
إللي هما كلنا يعني
إحنا
وحضرتك :)واللي ما يشتري وبيتفرج وكمان :)

لكن طبعا أهلا بك وبرأيك في كل حال :)


تبقى ملاحظة بسيطة عن رشا عبد الرازق
أنا ديما عايزه أكتب
مدام أنا شاعرة زي ما حضرتك وصفتني أبقا لازم ديما عايزه أكتب
مهي
دوايا وأكلي ومشربي
خلقة ربنا بقا :)

وديما بردو _ وهذا أكثر من معروف_
بكتب اللي بحسه
إللي بحسه وبس
وحكاية الكتابة عشان شعبية الموضوع دي يعني بيتهيقلي مش لايقه خاااااااااااااالص على قلمي ولا مدونتي العاديه
وده مش لسه محتاج توضيح

واللا إيه ؟ :)


قوللي بقا
إيه حكاية آدم وكاتب دي
مش فاهمه !

لحد بقا ما تقولي
فإنت نورتني :)

walaa rizk يقول...

مش عارفه أقولك آيه

غير الله عليك

عبرتى عننا بجد

دايما متألقه

يا اجمل رشا بجد ف الدنيا

AbdElRaHmaN Ayyash يقول...

بجد ...
مبدعة
و بجد ....
حرام عليهم اللي بيعملوه فينا ده

تليفزيون ملون يقول...

بارك الله لك فى حروفك ...

كرانيش يقول...

لو هنتكلم على المستوى الادبى
فانا لازم اقول حاجتين
اولا : النص كان ممكن يطلع احسن من كده بكتير لو شلتى كم المباشره اللى فيه دى
ثانيا : انى قريتلك حجات احسن من ناحيه المستوى الادبى

وعلى فكره انا مع ادم المصرى ولاول مره
انتى كتبتى بانفعال اه حاسه بيه وكل حاجه منفيناش الاحساس عن القصيده لكن فى حجات الكاتب بياخد باله منها وده زى ماقلتلك ملاحظاتى فى الاول

بعيد عن ده كله
انا بقدرك قوى كشاعره
نيجى بقه للمستوى الانسانى للقصيده
...
لنا الله يا اخيه

speaking يقول...
أزال المؤلف هذا التعليق.
speaking يقول...

ما تموتو عريتو الزمن
والله عندك حق يا ابن المجرمين
الشحاتين
هيعيشو ديما ميتين
...
مش دي الحقيقة؟
أحنا اللي رضينا بالذل قبل الذل ما يقوم يدور علينا

سلام

يوتوبي قديم يقول...

عندما نذوق الضيم ولا نجد من ينصفنا!!
عندما يعربد في مناحي جسدنا الظالمون!!

ويلي من ذاك الشعور


الله عليكي يا رشا

من كتاف النصيب للقصيدة الجميلة دي

انتي هاتخليني كده مدمن مدونتك

ان شاء الله هابص على بقية المواضيع

تحياتي

أخوكي

الأدباتي

أو "هادي فاروق"

رشا عبد الرازق يقول...

عاشقة الأقصى
شكرا غاليتي

الوجع واحد
ولم يعد هناك شيء
يحدث للآخرين فقط

فكلنا غرقى في ذات المعبر
ومجني علينا بذات اليد
وجناة بذات السكوت

تحياتي لك :)

رشا عبد الرازق يقول...

AbdElRaHmaN Ayyash

تحياتي لمرورك

والله نسأله العافية ان شاء تعالى :)

رشا عبد الرازق يقول...

تليفزيون ملون

أهلا بك

وبارك بك

يسعدني دوام تشريفك :)

رشا عبد الرازق يقول...

كرانيش

أهلا وسهلا بك

الرأي النقدي المضاد يعطي قيمة للكلمات وقائلها
وعليه
فلرأيك أيضا كل التقدير
وفي كل مرة أتمنى ان أترجم إحساسي بقدر أليق من التميز لكل كريم بمروره وليس الاتفاق نجاحا ولا للاختلاف من ضرر

وفي ردي السابق على الزميل آدم المصري كنت أرد على طريقة طرح أكثر من ردي على محتوى رأيٍ ناقد :)

والتحية لك موصولة اليه

ولتقديرك امتناني
وفيض من التقدير

:)

رشا عبد الرازق يقول...

speaking

اهلا بك :)

كل الأطراف جنت
من مارس الذل ومن قبله

والجناية واحدة أيضا
بسنة الله في خلقه

تجيبها كده تجيلها كده هيه لازم تكون كده

:)

تحياتي

رشا عبد الرازق يقول...

الأدباتي
هادي فاروق

أسعدتني بتواجدك اليوم والمدونة مدونتك يا أفندم وتزداد سعادة ونور بيك

على فكرة
حلو أوي
وحقيقي أوي المعنى ده

عندما يعربد في مناحي جسدنا الظالمون!!



لك خالص تحياتي :)

مجدى الجبالى يقول...

أيوة كده مش قلتلك العامية أفضل
و شعرك المره دى فوق الممتاز رغم إنى محروق منه أكتر منك بكتير علشان الوضع المهين اللى كنت فيه يومها بس مقدرتش أعبر زيك كدة

المهم حطى خيبتك على خيبتى
وادعلنا بالرحمة
تحياتى

غير معرف يقول...

مبروك علي مدونات مصرية للجيب
القصيدة بتاعتك موفقة جداً
واتمني التواصل
عمرو حسن

محمد عتلم يقول...

باضت وطن ؟؟؟؟؟ حلوه البيضه دى اوى..
وكمان عجبتنى اوى وتسلم دماغك
وبما انى على لحم دماغى من زمان ف انا مضطر اسلق البيضه دى سلق مبرح حتى الفرقعه بس ياريتها تستوى عشان بيض الوطن مش بيستوى
وعموما بجد جميله