الأربعاء، فبراير ٠٨، ٢٠٠٦

وآآآآآه يا ضنايا آآه يا ابني

وآه يا ضنايا آه يا ابني
تِموت في العمر كام مره ؟
وليه من مره ولا مره
مترجعشي
لحضن امك
طب ارجع حتى لو ميت
حشايا يا ابني آه يا ابني
حشايا الصاحي بيعيط
لو ألمِْس في الوداع دمك
وأبوس راسَكْ
لو أحفر قبري ليه قبرك يكون مِنْداس ما بين ناسك يكون النار
يكون الدَّم ع السكين
يكون البحر في النَوَّه اللي مكتوبه بايدين غدَّار
وبَتْمَصْمَصْ عليك الخسَّه ميت خيبه
وميت زَمَّار

وآه يا ضنايا آه يا ابني
وآه م البحر فين وداك ؟
وأخدك تاني ليه منِّي
زمان القطر مرّه هناك
حَكَم بالنار يموتني
حرق عمرك وفاتْلي العيد يكون وخْزةْ فَرَحْ تِضْنِي
وجَهْ السفاح
هَجَمْ ع الليل بِسِلْسالُه
هدر دمّك وقال مالُه
يموت هوَّ
يعيش غيرُه
وايه يسوى الحمام للصقر لو حَدَف الغراب طيرُه ؟

وآه يا ضنايا
آآآه يا ضنايا
آآآآه يا فرحه مسروقه
يا ذنبي اللي مش ذنبي لكن سكينه مَرْشُوقه
في جمب الفقر واللُّقمه اللي موتك بيها شرَّقني
عروستك جمبي أهي يا ابني
وبتقولِّي يغور المهر
منيش عايزاها طَرْحَه بِتُلْ
دي كِسْرة عيش بايد أمي نغمِّسْها ولو بالذُّل
تِكَفِّينا
ومن امْتى الفقير لو جاع بيشكي ولو غموسه الهَمْ
هتبقى اهون على جوفنا من المر اللي مِتْعاص دمْ
خلاص يا ابني
مفيش فرحه وزغروتَه
نهاية الحلم جت بدري وزي الطُّوبه محْطُوطَه
في قلب أُمَّك
ومين يا ضنايا يِدْفعلي تَمن دمَّك
ومين هياخدلي بالتَّار اللي مِتْحوش سنين عندك
وليه الذنب يوم ما يِصيب وطن مِتْهان
يسدد في الحساب غلبان
وتِتْحسر عليه أُمك

هناك ١٧ تعليقًا:

ماشى الطريق يقول...

حاجة تبكى

غير معرف يقول...

you made me cry

aiman يقول...

i don't know if that was yours, or not.
but if it was yours ....
God bless you.
jazaki allaho 7'ayran

ابن مصر يقول...

طالعة من القلب...رائعة

محمود عزت يقول...

الله!

جميل :)

meho يقول...

حلوة بس تحزن ...هو ايه اللى مش يحزن فى بلدنا مااحنا بقينا رخاص قوى فى بلدنا ...يارب ما تتكرر تانى داهل البلد دى غلابة قوى والكبار كبار قوى قوى

رشا عبد الرازق يقول...

والحرف من النبضة أقل

والبكاء من القلب نبضة

والقلب أضعف الايمان




شكرا لمرورك :)

رشا عبد الرازق يقول...

عفوا تامر


فلا ادري ان كان يجب على قولك ان يسعدني او يشعرني بالحرج منك

عوفيت من الألم وعافنا الله ان شاء الله :)

رشا عبد الرازق يقول...

انها لي أيمن
ولله المنة والفضل
جزاكم الله وايانا ان شاء تعالى

:) اهلا بك

رشا عبد الرازق يقول...

ابن مصر

الحمد لله أنا لازلنا نملك حراكا في القلوب

شكرا لرقة اطرائك :)

رشا عبد الرازق يقول...

شكرا محمد على تحيتك الرقيقة وهذا مما يسعدني :)

رشا عبد الرازق يقول...

ولسه الغلابة بيدفعوا التمن

يمكن عشان الفتنة عمت وبقت مصداقا لقول الله تعالى " واتقوا فتنة لا تصيبن الذين ظلموا منكم خاصة " ويمكن عشان فعلا الدم المهدور على التراب ومنداس يوجع اكتر بكتير من دم الشيطان والظالم اللي وراه

نسأل الله العافية

تقديري :)

وليد يقول...

الغلابه هما السبب

هما اللى رقصوا فى الشوراع وحرقوا الاطارات
وهما اللى قفلوا شارع مصطفى كام ل عندنا لجوارى بيتى
وهما اللى قفلوا البحر فى المنشيه بشهادة صديق

عشان المنتخب غلب

الالعبيين كسبوا عقود وفلوس
والريس كسب
ماعدا الغلابه

بجد دول غلابه

aiman يقول...

Rasha ,
I came incounter with bloging accidently 2 months ago, when i first read for Ghada, ma3nafsy.
I consider starting bloging myself, because of how fine both your writings are.
Thank you,and again, jazakom allahu 7'ayran.
my blog is kingtut4real.

رشا عبد الرازق يقول...

وليد
مش بحب النظرة دي عشان احنا عايشين في مصر نظرية البيضه والفرخه ومش لازم تنكرها
ناس كتير هاجمت الشعب عشان فرح لفوز المنتخب وانا مع اللي قالوا ان دم الغلابه يومها كان سايح ومحدش راعى ده وبسمع كتير بيسألوا ليه الماتش بقا هوة البطولة والفوز فيه بقا هو النصر والغنا ليه وطنية ؟ كل الاسئلة دي منطقية ... بس التظاهر للماتش ملوش عقوبة ومفيش منه خوف ... واللي واخد على الهزيمة وتعب م الهوان بيبقا اي نصر في اي حاجه حتى لو كان ببركة دعا الوالدين حلم كبير يمكن معدش عنده غيره ؟؟؟ انا مش بدافع بس بحط روحي في مكان الناس .... مو متجيش تسرق من الناس قوتها وصحتها وكرامتا وتربيها كمان على الخوف وبعدين تلوم عليهم الجهل والسطحية والرعب من الامتهان اللي محدش بقا كبير عليه
فاهمني ؟ ...

رشا عبد الرازق يقول...

جزانا واياكم أيمن
شكرا على كلماتك الرقيقه ورأيك الذي أسعدني واهلا بك :)

Hassan Laithy يقول...

جميل بجد .. وأكتر حاجة عجبتنى فى البلوج بتاعك انك بتفرقى بين التاء المربوطة والهاء والهمزه والمد والحاجات دى يعنى ... ناس كتير مش بتكتبهم صح ودا بينقص من جمال الكلام ... برافو عليكى