الخميس، يوليو ١٩، ٢٠٠٧

بَــواقِــي طُفُــولْتـِــي

بودع فيك بواقي طفولتي يا صحبي
واعاتبك ليه
وداعك فيه رضا ربي
وداعك كان معاد مكتوب على جبينك ومتخبي
ومكتوبي خلاص أكبر
وانا جواك يا دوب بحبي
يا نن العين
أنا هيه
اللي شدت خطوها بعمرك
عشان عود الشباب يتشد
اللي كانت سانده أحلامها على كتافك
ومتحاوط عليها بسد
اللي عاشت بيك كلام تاني
معاك اتقال
وفيها اتمد
أنا "الحدوته" ...و"الدلوعه"....و"الضحكه اللي زي الورد
"أنا وسط البنات بنتك
على قولك " يا دوب البنت "
عرفت ازاي يا صحبي كبرت
عرفت ازاي أنا هيه
!اللي صحيت فجأه
عرفت فجأة
فين وقف الحنان ووقفت
من الساعه اللي لما ناديت عليك فيها ولما سكت
وبُست عنيك
عارفها عنيك
؟
على مرايتي هشوفها كتير وطول ما الضي ده في عيني
وليه يا وشوش بتبكي عليه وليه عماله تبكيني
محدش فيك يا أغلى الناس يطبطب أو يعزِّيني
عشان دمعي اتحبس على مُجريات كِتفك
وكتفك فين
؟
عشان منتش يا دوب بابا
ولا حزني عليك آهه اذا طالت تكون حرفين
ولا نار الفراق بركان
بواقي طفولتي كانت فارس الفرسان
كانت حضني اللي بيك دفيان
ومية حب ترويني ومتملش من العطشان
كانت شِعري
اذا قُلته
عشان يرضيك ولمُت عليه
كانت خوفي اذا اتحجج عشان بإيديك تُطُل عليه
ويتمايل على ضفرتين
بواقي طفولتي في وداعك
بودعها وأشيلهالك
على معادنا
في نن العين

هناك ١٧ تعليقًا:

غادة الكاميليا يقول...

موجع أوى يارشا
أنا دخلت عندك وأنا لسه جايه من هناك لما بيوحشنى لازم أروح بس بتقتل لأنى مبقدرش أخبي دموعي
.........
تحياتى

غير معرف يقول...

عرفتي يارشا تطلعي كلمتين خففو الحمل عن قلبك ولو شويه .. أنا اعمل أيه في قلبي الحزين .. أعمل أيه لما أمر علي الكورنيش وعيني تشوف الكرسي اللي كان متعود يقعد عليه .. وأعمل أيه في حلم جميل كنت مستنيه لما يجي علشان أحكيه ليه .. ولما تيجي سيرته وأبويا يدور وشه علشان ما أشوفش عينيه

كنت مستنيه تكتبي من زمان .. قلت يمكن تخففي عني شويه لكن وجعتيني

م يقول...

انا عارف ان الكلام بيريح وخصوصا لو كان شعر
ياريت القصيده دى تخفف عنك شويه
ربنا يريح قلبك

Halawa يقول...

الحمد لله
انك طلعتي الكلام ده ربنا يصبرك ويكرمك

دمرتيني بجد
بس هنعمل ايه بنحبك ونحترمك

بالتوفيق يافندم

Ahmed يقول...

كويس انك طلعتي اللي جواكي
وعايزك دايما تعرفي
ان قربنا من الناس دايما بيكون بالكلام عن سيرتهم الحلوه
حتى بعد رحيلهم
تحياتي

الخيط الرفيع يقول...

البقاء لله
جعله الله من سكان الفردوس الاعلي

اكيد انا الان اشعر بمنتهي العجز إزاي اقول كلام يعزيكي
بس
لو عندي كلمه هقولك حاولي
حاولي.... تكملي لوحدك وعلي طول خليكي قادرة علي المعيشة بجهازك التنفسي انتي
مش بجهاز حد تاني حتي ولو كان جهاز احن واقرب الناس ليكي ممكن لو مقسوش عليكي
الظروف تبعدك عنهم
حساكي قوي لاني عندي مشكله مؤقته في جهازي التنفسي
ومشكلتنا احنا البنات اننا كلنا عندنا جهاز تنفسي رجالي اب أو اخ او زوج
شئ مهم وضروري وغريزي كمان
بس لازم نعرف نعيش ظروفنا الصعبة
ونعمل حسابها من باب الاحتياط
تحياتي

ثورة يقول...

البقاء لله رشا
كنت أحب أزور البلوج لأول مره في ظرف أفضل
صبر جميل يا رشا
وادعيله ومتنسيش إننا كلنا جينا الدنيا عشان نبتلى بيها فضلا عن إن الحياة الحقيقة مش فيها
ربنا يصبرك
كلمات ولا أروع
مش عارفه أعبر عن إعجابي بالبلوج كله دلوقتي
لنا لقاء آخر

goodman يقول...

مدونة جميلة واتمنى ان تزور مدونتى الناشئة

goodman يقول...

اعذرينى فلقد ارسلت لك تعليق على بوست 7 نوفمبر 2006

انكسارات .. احمد البوهى يقول...

احساس عالى جدا
ومعاه بتمتلكى ادواتك بطريقة تعينك على التعبير بشكل جذاب
تحياتى

رشا عبد الرازق يقول...

غادة الكاميليا .... سلم قلبك من كل حزن ودمعك من كل نفس
أشكرك يا غاليتي ... والله المستعان

رشا عبد الرازق يقول...

بسمه
وأنا خايفه آجي عندكم
خايفه من البحر
ونفس الشمسية ونفس المكان اللي كان بيجمعنا معاه
أد الحب اللي حطه جوايا لهناك
أد الخوف من هناك من غيره
دمتي أختا لي
كما كنت دوما له ابنة له
سلمتِ

رشا عبد الرازق يقول...

د. محمد الهندواي
شكرا على مشاعرك ... والشعر والكتابه وأي وسيلة فضفضه للي جوانا نعمة من عند ربنا
بشكرك جدا :)







حلاوه
شكرا على ثقتك وتشجيعك وذوقك وانا بيشرفني وجودك وبيسعدني ديما
أهلا بيك :)

رشا عبد الرازق يقول...

أحمد الحسيني
بنحاول
بس ساعات بنبقا أضعف من اننا نعيش المعنى ده طول الوقت
وخاصة لما يكون اللي كان مش بس قرب
ده امتزاج كامل لكيان بكيان أجمل وأصدق وأقوى منه بكتير
ساعات الجب مبيكونش على قد وصف الارتباط
ساعات الدم مبيكونش هو أقرب القرب
وفي كل الاحوال الحقيقه المؤكده
أن الحمد لله

شكرا لك





الخيط الرفيع
متعرفيش ومتتخيليش وقفت عند كلامك أد ايه
حلو جدا ان يبقا فيه ناس حاسه أوي .... فاهمه أوي .... وبتعبر عند ده ببساطه كده رغم إنها في الحقيقة بتوصف أدق الحقائق
شكرا لأنك هنا
واتمنى ان أشرف بك كثيرا

رشا عبد الرازق يقول...

ثوره
حضورك أكبر تعبير
وانتي ديما وفي كل وقت وظرف تشرفي
أشكرك على مواستاك الرقيقه
واتمنى أن ألقاك دوما
:)

رشا عبد الرازق يقول...

goodman
أهلا بيك هنا وفي أي بوست
وشكرا على مرورك :)

ســمـــر احمد يقول...

ومش عارفه اعزيك و لا اعزينى ..
ولا امشى جنبك على رصيف الوجع فى ليلة من الليالى البرد من (غيرهم ) وعلى لسانى دعاء بالرحمة و المغفرةليهم

رشا عبد الرازق اكيد بنت مش عادية