الثلاثاء، ديسمبر 30، 2008

مَـصر..مـِشْ هِيـَّـه الحُـكومَـه




مَـصر مش هيَّه الحكومه

مَـصرمش هربان ونايم

مَـصر"طيَّب " بالضرورة

لو يـِبان بالظلم

ظالم !

مَـصرمش رقْص وغناوي

مَـصرمِش حـَبّة كسالى مرْصوصِين فوق القهاوي

مَـصر مِيِت مليون مُناضل

فيهُم النـّـَفـَس اللـِّي مَحْـشـُور
فـِ الضّوافِر

لسَّه قادر ..

يِبْقا وقت الجَرْح تَضْميدَهْ على الدَّم اللي نازل

يبقا سَنْدِةْ كِتْـف مَكْسورة وِمَبْدورَه على هَـدَد المنازل

يِبْقا طَلـْقـَة فـِ صِدْر مُجْرِم

لما يـِتـْلـَقـَّى بـِعَزْم الصَّبْر شَلَّال القَـَنَابل

يـِبْقا لَمْلـَمِةِ اللـِّي فاضل

وارْتِجاعو

مَصْر مش هِيـَّه اللـِّي بـِتسَلـَّم على ايـِدين إللّي باعوا

مَصْر مش هِيـَّه اللـَّي بِتوَطـَّي في صوت الحَقْ من بعد ارتفاعو !!!

مصر يعني ... كل مصري

ياما مَاتوا جُوَّا مصر وبرَّا مصر وياما ضاعوا

وياما آسوا

وياما صـَلـْبـِةْ ضَهْرُهُمْ عـَدِّتْ مَصايب

ياما طول الصّبْر قوّاهم على زَعـْق الغرايب ...
إللـَّي زَفـَّتْ لِيهُم الموت بـِالزَّكايـِبْ

واللـّي رَفـِّتْ رِمْشُهُمْ مع كُل صُبْح بـِهـَمْ صايب

واللي عايزين يـِلمِسوا وجعك يا غزه بقَـلـْب طايب

آه يا غزه ....

إنتي نازَفـَه وجَمْبي نازِف بالوَجَعْ مَعَ كُل غـَزَّه

إنتي فاكرَه الدّم هايـِنْ ؟

إنتي فاكرَه المَصْري يـِقـْدَرْ يِبْقا خايـِن !!!

لو على دم الشهادة

يبقا طول العمر دايـِن !

لو على شرف العباده

يبقا بـِيْحاول...وِصاين

إنتي فاكره المَصْري خايـِن؟؟

أوْ مُنافـِق ؟

أوْ بـِيـِتْحَجِّجْ بـِعَجْز الحِيلة غيرْ ذُل الحقايـِق؟!!!!

والا فاكرَه ان احْتِلالِك

خيط مَهُوشْ مَوْصول بـِقَهْرْ المَصْري مِنْ دون الخلايـِق !!

لَجْل لمَّا تِنادي يـِسْمَع

نـَدْهِتِكْ تِدْبَحْ....

وِتِوْجَعْ

والغضب _لَوْ كان مالينا_ لجْلِ خاطرِكْ سَهْم راشِق

رَشْقِتـُه بـِتْدوُر عَلينا .... بالرّقابْ فوق المَشانِق!

واللـَي كان قايم يا غزه

يبقا عايز ألف قـُومه

لو تـِبان الخطوة عاجزه

تبقى مقـْطـُوعَه على السّكـَّة مَهيشْ ماشيَه على رِجْل الحكومه !!

مصر من جُوَّاها عايزَه....

لأ أ ّ

مش هِـيَّـه الحُكومه .

هناك 43 تعليقًا:

romansy يقول...

اول تعليق


على


الكلام الجميل


ل



رومانسى

romansy يقول...

مصر بلدى وبحبها كده زى ما هيه

بحب فيها الصحراء والخضره والميه

بحبها زى ما هيه
بالعلماء اللى فيها

والحراميه

دا مش ذنبها ان دول يبقوا كدا
احنا اللى من طبعنا نغدر

barbie girl يقول...

مصر مش هى الحكومة .. لكن دا لا يعنى ان المصريين كلهم كويسين

!!! عارفة ... مش عارف ليه يقول...

الله عليكي

معلش مش قادر
أضيف أكتر من كده

بنت الماضي يقول...

مصر..شهداءها في كل ارض من الكويت لليمن لسوريا وفلسطين للجزائر والسودان
مصر...اتداست كتييير عشان غيرها يعلا
ورجعت لورى كتييير عشان تاخد بايد اخواتها
فينا ولادستين بتاع
بس لسه فينا رجاله ومحناش خونه....

رشا
يسلم احساسك يارب
وحشاني على فكره

غير معرف يقول...

99
رائع وبالتوفيق إن شاء الله
99

محمد عتلم يقول...

طبعا مصر مش هيه الحكومه...

MaNoO يقول...

ياريت كل الناس تقدر الكلام دا وياريت الناس تفهم يعنى بلد ويعنى ايه حد بيتعامل بطريقة ساذجة مع اى فكرة او موقف سياسى نتذكر لتاريخ ياعرب ياللى فاضوا منكم دلوقتى يطلع يشتم فى مصر والله جه الزمن اللى احنا نطلع خونة امال اللى يشرب الخمر مع بوش يبقى ايه اللى يبقى ليه بيت فى تل ابيب يبقى ايه الكلام كتير ولو بنفهم تاريخنا صح هنعرف نعيش فى حاضرنا

هاني رمضان يقول...

يسلم حسّك ..
نص ـ كعادتك ـ بيحلق في منطقة محدش بيمسها غيرك بين أننا نقول كل حاجه بكل وضوح وما نفقدش "الحس" الشاعر ..
معادلة صعبة معاكي أسهل ما يكون ..
مش هطوّل
سبب التعليق الحقيقي !!
ده رقم حساب بنكي يتم تلقي التبرعات من خلاله لصالح غزة (تم عرضه في برنامج القاهرة اليوم )
(25015) بنك بيريوس.
يا ريت نقدر نوصله لعدد معقول من الناس خلال اليومين الجايين دول ...
فرغم الوعي عند البعض لكن الكثيرين ( محتاجين حد يقولهم ياللا والنبي !)
تحياتي وتقديري

سمير المصرى يقول...

أدكوكم لقراء مقال /سمير المصرى على مدنة (نور الحرية)على
http://nourelhoria.blogspot.com

رشا عبد الرازق يقول...

مفيش ذنب يا رومانسي بينزل على الناس من السما
مفيش ذنب مش ذنب حد
يمكن
فيه ذنوب اكبر من ذنوب
وفيه بريء بيتاخد بذنب مذنب لانه شريك بذنب السكوت أو الضعف


لو مفيش ذنب
يبقا مفيش عدل
والعدل موجود للي يدور عليه عند اللي يقدر يديه
اللي هو اللي يقدر يرفع الذنب

انت نورتني اول وتاني
ودوما
اهلا بك

:)

محمد أبو الفتوح يقول...

غزه انفلات الحلم من كف الجنون
غزه ارتباط الروح بأصناف المنون
غزه ابتداء القول بنون و مايسطرون

رشا عبد الرازق يقول...

أتفق معك يا barbie girl تماما
وأشف
ان مفيش أي ناس كلهم كويسين

وحاجه من الاتينين عشان الكويسين يقدروا يعملو حل أو تغيير

يا اما يبقوا أكتر عدديا
يا اما يبقوا أعمق ايمانا بما يجعلهم ( كويسين )

أهلا بك يا عزيزتي ولك شكري :)

رشا عبد الرازق يقول...

!!! عارفة ... مش عارف ليه

شكرا جزيلا لك

تقبل فائق تقديري وامتناني لمرورك :)

احمد القيسي يقول...

يا ريت نفرق بين كلمة الحكومة والنظام .. الحكومة دول شوية موظفين جابهم النظام اما النظام فهو الحزب الوطني وعلى رأسه مبارك وابنه والحجه امه

أحمد كمال يقول...

أجيالنا ماتعرفش مصر ، علشان مصر كانت مخطوفة ، لكن هانت ، إن الله غالب على أمره و لكن أكثر الناس لا يعلمون

تليفزيون ملون يقول...

تسلم ايدك يا رشا يا بنت عبد الرازق ..

ربنا يعزك و يكرمك و تفضلى دايما تطلعي اللى جوانا باسلوبك السلس ...

مصر مش هي الحكومة ...
طب و بعدين ... ؟؟؟!!

تحياتي
تليفزيون ملون

tkhareef يقول...

مافيش حد مش مسئول عن اللي بيحصله
يمكن مش مصر هي الحكومة لكن مصر هي السبب فإن ديه الحكومة حتي لو جت بالتزوير احنا السبب افي لتزوير
احنا السبب فإن ديه حكومتنا وده وضعنا

رشا عبد الرازق يقول...

ايمان بنت الماضي
أنا التي اشتاقت لك أكثر يا عزيزتي
وحاولي يكون اللقا قريب على اساس يعني ان معرض الكتاب على الأبواب واللا ايه ؟ :)

مصر كده وأكتر من كده وخير أجناد الأرض طبعا

بس عارفه... انا أكبر أخواتي البنات
احيانا ببقا مخنوقه ومدايقه أو مشغوله ومضغوطه ومش فاضية ومش قادره أقف جمب أي حد

لكن مقدرش أقول ( لهن) واللي انا عودتهم ديما اني أكبر سنا وأقدر بالضرورة ( وده في عقليتهم مش شرط يكون حقيقي بصراحه )..
مقدرش أقولهم ارحموني بقا .... ما انا ياما عملت ... حسوا بيه .... مبقتش قادره !!!ولا أقدر ألومهم لو زعلوا مني ساعتها
مش عشان انا كده بتخلى عنهم
لأ ... الأهم اني انا كده بتخلى عن دوري !!!
فاهماني ؟
مش عيب ان الصغيرين ( حتى لو قادرين ... وحتى لو وحشين ... حتى لو مقصرين أكتر .... ) انهم يشفوكي أقدر !

:) الله المستعان

رشا عبد الرازق يقول...

شكرا لك 99

تمناني بالتوفيق :)

رشا عبد الرازق يقول...

محمد عتلم

شكرا لمرورك وقد شرفت المدونة

تقبل تحياتي :)

رشا عبد الرازق يقول...

MaNoO تحياتي ليك
مش عايزه أقولك كلام قلته
ومحدش ينكر تاريخ مصر
بس انتي فاهمه يعني ايه مصر مش هيه الحكومه ؟
يعني فيه موقفين في مصر
والموقف المأخوذ به مش موقف الشعب صاحب التاريخ اللي بتحكي عنه
واكيد مش محتاجه أقولك
ان تميز او ريادة أو احترام أي شعب او وطن مينفعش يكون مبني بس على التاريخ

كل لحظه بتعدي الحقايق بتبان للأسف

شرفتي وشكرا لمشاعرك :)

عمر يقول...

جامدة طحن
و جاية فى وقتها
هو دا الشعر العامى الصح
بس اسمحلى اعترض على اللهجة المفترية شوىة فى البوست اللى قبل ده
مش لازم نظلم العروبة عشان الحكام الخونة
و اسلامنا مش ضد العروبةبالشكل ده

ربنا يباركلك

Shimaa Esmail يقول...

الأستاذة/ رشا عبد الرازق
صاحبة مدونة / بنت عادية جدا
" تحية طيبة" وبعد..
اعتذر عن الخروج من موضوع التدوينة، لقد أرسلت لكِ دليل العمل (صفحتين)والجزء الأول من الاستمارة (8 صفحات) ، أرجو منك إرسال رسالة توضح أن الجزء قد وصلك وأنه ليس هناك مشكلة في إرساله أحالت وصله لسيادتك .
تحياتي وتقديري
شيماء إسماعيل
باحث ماجستير- كلية الآداب جامعة القاهرة.

رشا عبد الرازق يقول...

هاني رمضان
تحياتي
وشكرا على استمرار رأيك ده بكلماتي
أحسن انا شخصيا ببقا ساعات محتاجه أصدق ده

بشكرك تاني
والشكر موصول لايجابيتك ودعوتك الكريمة لأن فعلا كلنا مش ببنسى
وكلنا محتاجين حد يفكرنا !!!

تقبل وافر تقديري وامتناني

رشا عبد الرازق يقول...

سمير المصري
شكرا لدعوتك ومرورك
وتحياتي للمقال وصاحبه :)

رشا عبد الرازق يقول...

محمد أبو الفتوح
وكلمات جميلة
وفرصة لا تقدر لتعريفي بقلمك
شكرا جزيلا لك
ولغزة
لأنها ستكون العلامة والبداية لكل ما هو قادم
سواء كنا جزءا منه أو تخلينا عن هذا الشرف

تحياتي :)

رشا عبد الرازق يقول...

أحمد القيسي
اهلا بك
لكن كلامك تحديدا لا يحمل هذا الفصل اذا راجعته جيدا ً!

وعموما
قال صلى الله عليه وسلم " كلكم راعٍ وكلكم مسؤول عن رعيته "

تحياتي

رشا عبد الرازق يقول...

مهندس احمد كمال

ونعم بالله
ولقد صدقت ان شاء الله
وأجيالنا _ نعم _ تعايش مسخ مصر
ولعل من يصدق الله يرى بنفسه او بانسان منه مصراً أخرى لأمة أخرى

لك تقديري المتواصل

وبجد بجد بجد فعلا

خطوة عزيزة :)

غير معرف يقول...

الله عليكى بجد بس ياريت نعرف ان الحكومة كانت فى يوم طفل وكبرت على ايدينا بسلبيتنا وقبل ما نفكر فى الحكومة لازم نصلح نفسينا انا بسمة مسلمhtpp:\\hamssat.blogspot.com

رشا عبد الرازق يقول...

تلفزيون ملون
جزاكم الله خيرا ولك خالص شكري على اطرائك

وبعدين ؟!!


حتى يقضي الله امرا كان مفعولاً

شكرا لك

بذرة امل يقول...

اللى يقول ان مصر هى الحكومة يبقى سورى يعنى ما بيفمهش حاجة
كلامك جميل

تيوليب يقول...

بجد رائع يا رشا
كلامك و اسلوبك بيعجبونى جدا

رشا عبد الرازق يقول...

tkhareef
نعم
كما تكونوا يول عليكم !

شكرا لحضور رأيك واهلا بك :)

رشا عبد الرازق يقول...

عمر
اهلا بيك
شكرا خالص على رأيك
بس لعلمك
العامي اللي بجد بجد يعني ..... لسه شوية يا مسهل والحمد لله

مش مفترية
أن مش ضد العروبة
أنا ضد فصلها عن ما يعطيها قيمتها والواقع خير دليل يا عزيزي
قناعتي تربط قيمة العرب باسلامهم
والمنطق التاريخي _ من وجهة نظري _ يؤكد على ذلك
شكرا لك :)

رشا عبد الرازق يقول...

شيماء :)
عذرا تاخرت عليك بعض الشيء
تحياتي ولنا لقاء :)

رشا عبد الرازق يقول...

بسمه
يعني
هيه عملية متبادلة
محدش بريء منهم
بس محدش بردو متهم لوحده

تحياتي واعزازي :)

رشا عبد الرازق يقول...

بذرة أمل
أهلا بك وشكرا لوجودك
وكل واحد بيتكلم من قناعاته وحدود ادراكه :)

وجه جديد د.أحمد عثمان يقول...

مصر روحنا
مصر احنا
و احنا ف وسط الهم روحنا
و اللي راح حالف ما يرجع
و اللي يرجع
يرضع الذل ف عروقه
إما يهرب
و إما يركع
و مصر هربت يوم هربنا
يوم ما روحنا
أصل مصر

تبقى احنا

تحياتي لك مبدعتنا
زيارة تأخرت كثيرا
كل التقدير



سامحيني على خربشتي و محاولتي

رشا عبد الرازق يقول...

تيوليب
هذا مما يشرفني كثيرا
تقبل فائق امتناني :)

رشا عبد الرازق يقول...

أسامحك ايه ؟ امال هشكرك امتى د. احمد عثمان
كل الشكر لك على خربشاتك ( والخربشه صفة جميلة عندي )
زيارتك أثرتني وأسعدتني جدا
تحياتي وصادق الامتنان :)

ثورة يقول...

مكنتش متخيلة إني لما أزور مدونتك بعد طول غياب
هلاقي الرائعة دي

ربنا يحميكي يا رشا
انتي ثروة

mahmoud يقول...

مجهود رائع

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير

مطعم على الطاير